Ptice nebeske

Od kad je svita i vika zapisano je:
Prvo: maslina je sveto stablo.
Drugo: stablo mira.
Treće: stablo vičnosti.
Sve čovičansko je stalo u ove tri rečenice.
Tisuće i tisuće godišta nosi maslina te tri vridnote. Nosi u lipoti pivanja, nosi prćena u gorčini, u žuljima težačkim, u štovanju kamika u žešćini, trpi brižna sušu i snig, trpi i napasti svekolike, lupeške.
I vi, lipi moj svite ako vas more doplovi do bilo kojeg otoka zadarskog arhipelaga za podneva u sadašnjemu vrimenu, svas bodulski svit je na maslini.
Boduli i tice nebeske.
Reći, nako, po našu, reći po Bogu i Mariji, nije baš na svakom otoku ovogodišnji rod od vele zahvale, na jednom otoku je Ponikva, pripostavimo, darovala puku u obilanciji, na drugom burnje grane masline sušne, medika, črv, takajica…
Štetočina, takozvani svrdlaš dešva je urod, učini je velu šćetu.
Ala, manje grintanja.
Ovo doli zapisano bilo je prije dobrih trideset godina.
Da je Jadre bolestan, priča se po školju. Timunjer od Jugo-lajn, stina od čovika a bolestan u vrime jematve, a masline zovu, jerbo ni lumin ne gori kako Bog zapovida na ulje od suncokreta.
Bura puše, dere ka napast, a mi lipo drito u Jadre. E, došla nas lipa kumpanjija. Jadre leži, muči, fuma…
Zaželili zdravlje betežnemu. „Ča, je?” Ka bolest te mori Jadre rode?” potiho će Miško.
„Pspspsss! Silencijo! Neka nas ne čuje ona doli”, čini mot Jadre, misleći na ženu Gašpu.
Mi svi – kuco.
„Najprvo ćemo se napiti”, govori Jadre i ispod koćete dohvati bocu pelinkovca i bocu konjaka.
Popili po bićerin, niki i dva. Zafumali.
„Mi smo ti Jadre ka nika vižita od medicine, svidoci za taštament… Eee, ča je?” u po’ riči će Miško.
„Kaco ću ja ozdraviti dok moji ne poberu masline!”
Mi svi ka zanimili u čudu.
„Lipo ste čuli. Jadre je u velin jadu i čemeru dokle moji ne pokupe do zrna masline.”
Mi i dalje svi kuco. A kako i ne bi, zlato i biserje darova nan Svevišnji a Jadre bati tršticiju na koćeti.
Jadre će jopet u špade „Mate je niki dan pa’ sa masline u Gladuši. Ni vela šćeta ča je slomi livu ruku i dva rebra, nego je šćeta ča je slomi po’ masline, Oni, oni poveri Vice, naš zet od Kotara, isto pa’ sa masline i ala hitna, ala gliser i jedva ga oživili do ispod mosta u Ždrelcu. Po’ cotavih na otoku, polovica ovih ča su pošli na kvasinu…”
Ovdi je Miško presika Jadru u rič.
„A, muči buzdo. Brez masline, brez motike, vesla, mriže svi naši školji bili bi odavno izbrisani sa karte geografike. Va ben! Neka navigacije, neka Amerike, Zadra, Rike, Zagreba i, ovi, jel tako, ima nas po cilomu svitu, ma maslini sva čast i slava. Svi butigiri u Zadru kad bi im naši ćaće, matere, didi i pradidi pokazali misec dan prije ‘Sisveta rodnu granu od masline, dali bi im na
dug, akonto ulja, vriću muke. Pivali bi do školja sve na vesla u četvoro.”
„Jesi li fini tiradu, an ti Skojevče?” tiho će Jadre i jopet nas ponudi po bićerin.
„Nisan. Nego, kad bi Miško bi vlast moj kumpar Jadre jeo bi puru blitvu. Bravo i ribe brez kapi ulja maslinova.”
„Paaa, kad ste vlast, vi šjor Miško, naredite Svevišnjem da budem zdrav.”
Na ove riči Jadre, Miško je trgnu inbutidu, razgali Jadru i zapovidno reka:
„Diž’ se tovare!”
Šoto-škrito
Šjor Vice od butige Kalelarge