VIA GAŽENICA

Je! Lipi nas je bio broj u čekaonici prid biljetarnicun Jadrolinije.
Vani kiša. „Da je u oblaku barenko pinkucu pameti pa ovi pusti dažji rasporedi po misecima u godišću, učini bi posa atroke sira i kruva, “u beštimi će jedan Bodul.
– Vinko, sram te bilo. Znan di pucaš pogrdo, kontraje mu Bare. – E, jesi ga mona. Na ovim zneveranim svitu nima Bogu druge nego dangubiti za stotinu duzina bodulskih pokora. Nasta niki čudan, ma više lažan muk ki pari na gorčinu bure prid neveru. Svaki od nas od rođenja čeka, išće brod ki će ga odvesti na njegov školj.
Maro: Da san ja vlast svaki četvrti otočanin kad kupuje biljet za trajekt triba bi dobiti na revers mac karat od briškule i trešete. Ako ne zna igrati, voldir nima ih na školju za baciti partidu. Fali četvrti.
Pere: Ne bi ja tomu da u salon. Neka po buri čini gvardiju na kuverti.
Krševan: Tišina, god van ćaćin! Mi radi Gaženice tribamo u štrajk. Generalni. Referendum! Demonštracijuni! Neka nas priko televizije vidu i naši u ‘Meriki, Australiji, Argentini, u Čileu…
Bepo: …Da, u Čile? Nećeš ti dolari. Da nas vidu naši u Bonizajeru, u Vankuveru, Nevijorki… Trajekt nam je zavitrina za diliti pineze od Evrope.
Bare: …Nevijork je prebukiran. Ti Bepo znaš zemljopis jedino po bulima od pisma z ‘Merike. Svi Ravljani u Nevijorku svake nedilje u podne skupu se na Brodveju i atento čekaju kad će na Ravi – oliti centru svita, zazvoniti podne da juštaju leroji. Da, da šjor, vi Bepo. Ravsko zvono?! Nima jačega na svitu. More nosi glasi, donosi im pozdrav. Da mi je potriba od ženidbe – Rava ne bi zbrišala, jerbo na Ravi ni samo kolo igrati na koledišću, plesti od pruća panjeri, vrše, da, da. Divojak atroke u Bruklinu.   
Šimeto: Kako san ima čuti ti bi Krševane u generalni štrajk. Lipo. Ne plovu trajekti, ne plove ni ovi brzi brodi, ni butige, likari, apoteke, ni toverne, popi ne držu mise, ala reci ki će ti onda dati mac karat za briškulu i trešetu? Kad si u štrajku nimaš potribe spati sa rođenom ženom, san kuhaš, pereš robu, činiš lušiju, i svi kuco.
Jadre: Molin za dvi, tri riči. Kad nan trajekti, a iza trajekata i drugi brodi budu akoštali u Gaženici – mi smo u raju. Ovozemaljskom. Made in Croatia. Moremo na trajektu učiniti i državni udar, i u kompletu partimo za Ameriku.
Jadre: Zajebavate? Lipo. Sramota. Akošta trajekt u Gaženici a ti biraš. Moreš do Zagreba, Splita, Šibenika, Rike, Benkovca. Do aerodroma, do kolodvora, špitala, toverna, apoteka za likariju i agrar ti je u Gaženici, knjižnica ti i ne triba jer svi doma imamo libri, oni od Karla Marksa, Lenjina, ovih naših…
Krševan: …Pa željeznicom do Benkovca, jedva do Knina, priko Like… Učini nevera, kiša, autobusu ukrali gumu, a mi u kolonu po jedan: liva, desna, liva, ka na zavitu, u pokori… Do Grada, do Kalelarge. Ako su u điru fešte i feštice olalaa… Opala Đilda, ala boduli na bakalar in-bianko, tripice, gaunići frigani ka cukar, bevanda od opola oli žutice, vino nero, domaće.
Jadre: Dajem vam časnu rič u ime moje stranke. U svakom trajektu može se organizirati zbor radnih ljudi, samoposluga, misa, ako je u trajektu i umrli kršćanin može biti podmiren, ovi…da se ne dangubi na otoku. Uputi likar čovika pod hitno do špitala. Pacijent dobije na brodu  spovid i pričest. More prid svidocima učinit i taštament, ovo, e, za nedaj Bože.
Šimeto: I žena roditi u trajektu ako ga ima ki učiniti na školju, i te rabote.
Jadre: I ti si Šimeto poša na kvasinu. Pa Boga van poljubin sve je zapisano za Gaženicu u točku i zarez. Koncesionar gradi na pristaništu čekaonicu, zapravo dvoranu ala za kino predstave. Separe sa toliko i toliko kreveta za one koji tribaju drugi, treći dan učiniti razne vižite u špitalu. Bife, bar, toverna, butige, apoteka, zog za na boće, za kazališne predstave, more se i misa, jel tako…? Poškropiš, pokadiš… Akoštaju kruzeri, trajekti Zadar – Ankona, mega-jahte… Kontraband cvita.
Krševan: …A kažin?
Jadre: Krševane, kad arivamo doma, na školj, od rive maršira kolona do tvojih dvora. I za svaki goldun koga pokažeš prid kompanjijom svaki od nas tisuću kuna, može i dvisto dolari. Dac-ol?
Krševan: Ol-rajt! Maaa, dođe li na školj državna revizija za toliki pinezi, ti Jadre i tvoja stranka prtite cili grih. I ču si Jadre za kažine u ulici Lamarin-štrase u Hamburgu. I samo ču. A naviga si ka i ja, i bio u Đenovi, Tokiju, špija i akužava svoje kompanje, druže noštromo.
Jadre: Ja san van ti reći da će na trajektima biti na putovanju od školja do Gaženice i kulturni program uživo, pica kvatro stađoni, valcer, a ovi buzdo Krševan meni svaku rič u štroc. Antiprotivni element.
Šoto – škrito
Šjor Vice od butige Kalelarge