Koledar

Otok. Badnji dan godišta Gospodnjeg, prid Drugi svitski rat. Tratin deseto godište.
Bura puše od rasvanuća. U siromaha i najmanja bura pari na ljuticu, glad, makancu, prozeblost ćutiš u kostima.
Otočani gradiraju buru po riči vesla gajete, leuta, n.pr: dva vesla bure, četiri, šest vesla bure, po jedru: puno idro: trcarol (skraćenje jedra, i.t.d.)
I ča? Došla na otok za božićne blagdane šjora Tonka od Splita. Naša, rođena. Činila posa sluškinje, umrla joj gospodarica i udovac, vamo, tamo, oženi našu Tonku.
Dobrostojeća famelja. Tonka, muž i njegovo troje dice od pet do deset godišć.
 I okitila šjora Tonka na ponistri usrid sela do kalete božićno drvo: lipa kita bora, šiške, vuna od janjca čini snig, pa svićice, baloške u mile koluri gingiluju se na rič. Ispod bora jaslice. Sve po svetomu zapisu. Od diteta u slamici, jaslice u božjoj svitlosti, Tri kralja, do kara, tovara…
 Bura sve jača a mi dica sela uz funestru, ne skidamo oči s jaslica. Fila kreši do po’ kalete. Da zima? Da glad? Je! Zgubiš misto u fili – bolje da te ni.
 I don Karlo sa cilom svojom svitom od crikve blagoslovi je okićeni bor, lipo poškropi, kadi, dožunta i prigodno pivanje.
 Cili dan. Maaa štovani svitu, te kuglice u kolurima, te zvizde repatice, snig na borovoj šiški, a u basamenat jaslice….(!?) Nikad ni vidili, nikad doživili.
Parilo nan se da smo i mi u Betlehemu, a bura ne kaliva, glad kreši lela, leva a mi se ne damo.
Zaškurilo se, a Božićna jelka, niki ju tako zovu, na funestri čini nan nebesa. Ka vičnost, blaženstvo, i pivanje ćutin, mladolitno.
 I junda bonaca. Lunga. Ravni Kotari u crvenilu. Miseca kvarat. Pari na kus zadarskog kolača. I čini misec koluri po moru. Zlato u bonaci. I sve dalje, do po’ mora, do obruča od srebra, ‘Suse Bože bogatstva darovana školju, večeras će siromašni, gladni, ne, ne i betežni, njih večeras ni, sve će pivati. Sve živo ča se miče po svitu, i more će pivati, i ribe i maslina, kamik, i mahovina…
 Poša san doma, moja mater uz komin.
Nako, sidi, muči, krunica joj u ruci.
„Majo, reka mi je barba Mateo da ću ja prekosutra, na svetoga Stipana, posli vele mise nažgati koledu. Prvi KOLEDAR na školju.”
 „Ča to ćujin, majko Božja? Moj sin Ivan izabran za prvog koledara na školju u ovomu godištu!”
 „Je! Je majo. A, kad to reče barba Mateo, fabricer od crkvenoga odbora, nima falinge.”
 Muči moja patnica. Sve znan, ovo, e, za ćaću. Popeškom čeprka po lugu, ka nič išće, žari… “Sveti Stipan, prvomučenik. Kamenovan…” tiho govori, više za se moja mati. „Razbojnici ga kamenuju a Stipan će im: Gospodine, ne uzmite im ovo za grijeh.”
 Meknu san na komin dvi maslinove glavnje. E, i nima lipšeg ognja na kominu od maslinova driva.
„Koledar u brageše – krpa na krpi, ‘Suse Nazaranine!” mati će, nako, za se.
Unda smo mučali. E, ja i mati.
„Klasti ću ti te brageše u lušiju, lipo, pasati ih kroz lug, osušiti na kominu, sumprešati prvo mise na jenu rigu. Neka nam svi zavidu, moj mladiću.”
I jopet mati čeprka po lugu: „Zaprećala san u lug dva kumpira u kori, oni dva ča su pala z vriće barbi Šimetu. Kumpiri za sime. Da ni danas Badnji dan bila bi ih posadila. Ma, neka. I mi ćemo večeras blagovati.”
 Glavnja maslinova na kominu. Pari mi na največu lanternu na svitu.
„Ćaća ti, dragi sine, ni pisa ovo je treće godište. Daleko je Argentina… “
 „Reka mi je barba Mateo: Kad ti Ivane zapališ koledu, pa zeleno maslinovo lišće učini dim povrh našega školja, pa sve do neba, do Argentine, ćaća ti ugleda dim i zavikne:
„Moj Ivan je nažga koledu! Moj Ivan je najveći KOLEDAR na svitu.!”